എങ്ങോട്ട് ?
ഘടികാരത്തെ വലം വച്ചുള്ള ജീവീതയാത്രകള്‍..ഞങ്ങളിലൊരാള്‍ക്ക് ഔദ്യോഗികചങ്ങലപ്പൂട്ടില്‍ നിന്ന് മോചനമായതോടെ ദൂരങ്ങളിലേക്ക് കണ്ണുപായിക്കാനായി.പോകാനാകുന്നേടത്തൊക്കെ പോകണം.പക്ഷേ , ചെറുപ്പത്തിന്റെ ചുറുചുറുക്കൊക്കെ കൈമോശം വന്നില്ലേ ? റിസ്കുകളില്‍ ആവേശമല്ല ,ആശങ്കകളാണ്.. അങ്ങനെ ഒരു ഡെസ്റ്റിനേഷന്‍ ടൂറിസത്തിന്റെ വലക്കണ്ണികളില്‍ അറിഞ്ഞുകൊണ്ടുതന്നെ ചെന്നു കുടുങ്ങിക്കൊടുത്തു. നല്ലൊരു തുക വര്‍ഷാവര്‍ഷം അടച്ചാല്‍ പലപല ടൂറിസ്റ്റ് ഡെസ്റ്റിനേഷനുകളില്‍ നിശ്ചിതദിവസങ്ങള്‍ താമസിയ്ക്കാം.അങ്ങനെ മാറ്റിക്കെട്ടുന്ന കുറ്റികളില്‍ കറങ്ങിത്തിരിയുന്ന മാടുകളെ പോലെ ഞങ്ങളുടെ ജീവിതസായാഹ്നയാത്രകള്‍.. നാലുകണ്ണുകള്‍ ചെന്നെത്തുന്ന കാഴ്ചകള്‍ ഏറെക്കുറെ ഒന്നുതന്നെയെങ്കിലും കാണുന്നതും മനസ്സില്‍ തങ്ങുന്നതും ഏറെ വിഭിന്നമെന്നതും കൗതുകകരം..ഓര്‍മ്മയില്‍ നിന്നും മാഞ്ഞുപോകാതിരിയ്ക്കാന്‍ ഡയറിത്താളുകളില്‍ പകര്‍ത്തതിവച്ച യാത്രാനുഭവങ്ങള്‍ പങ്കുവയ്ക്കട്ടെ..